عهد الميدان اهداء لمنتدي سمر وشهد

عهد الميدان

إن إحنا نرجع قلب واحد م الميدان
مهما كان
مين اللي خانك
مين اللي خاني
مين اللي خان
ليه بلطجية
وميت قضية
والضحية بنت الجيران
بلطجية ف كل مكان
تحت البيوت
فوق البيوت
ف الشوارع
ف الحواري
ف النواصي
غلبو الشيطان
يتكون معاهم
يإما فلول
يإما جبان
طب كنا ليه قلب واحد ف الميدان
مليون واحد
صف واحد
واللي جمعنا كان أذان
قتلنا فينا
كل شخصية جبان
نسينا
كل أسم لينا
وافتكرنا إن الوطن
أكبر كيان
الطبيب خد شنطته وراح الميدان
والأديب قال كلمته ف قلب الميدان
والفلاح
أصل الكفاح
كان كل همه يزرع وردة ف الميدان
من الميدان
بنينا دولة مصر ثاني
بنينا المساجد علي أرضها
والكنائس علي أرضها
نبني وندعي ربها
يحميها من غدر الزمان
من الطغاة من الشيطان
من اللي داسنا بجزمته
وحرمنا من حق اللسان
طب كنا ليه قلب واحد ف الميدان
حد فينا كان بياكل
وجاره حد كان جعان
دم الشهيد غرق ملابسك
لا النيل يزيله
ولا حتي مسحوق الزمان
طب كنا ليه قلب واحد ف الميدان
أخاف عليك
وتخاف عليا
عشانك الموت
شفته بعنيا
ضرب الرصاص اللي صابني كان فداك
ولما الأمين ضربك
خدي كان فداك
فاكر التنحي يوم أنا
كسبت الرهان
طب كنا ليه قلب واحد في الميدان
كنت أما تتعب انيمك
وكنت ليك حصن الأمان
طب كنا ليه قلب واحد في الميدان
إيه ذنبها بنت الجيران
ليه تغتصبها
وحقها دا
عند مين
ليه يعني كان هو اللي
مخليك أمين
تقتل أخوها خلاص بقا
مفيش أمان
ذنبها إيه بنت الجيران
طب كنا ليه قلب واحد في الميدان
ألف حزب وكل فرد له مطالب له أماني
أعلنت حرب عاليرفض
رأيي أآني
مليونية عشان نسقط الإتحاد
مليونية عشان نصحح
مسرات
ومليونية عشان نهدم سفارات
ومليونية عشان نجيب حق اللي مات
ليه هو ضاع حق اللي مات
حق اللي مات خدناه
ف نومته عالسرير
ومازال أسير
حق اللي مات خدناه
في حبس الوزير
حق اللي مات خدناه ف وحدة شعبنا
خدناه ف قوة قلبنا
ومحال نسيب حق الشهيد ومحال نسيب حقنا
سيبو القضية للقضاة
هو دا قانون الحياة
أه يابلد
بلد الأمان
طب كنا ليه قلب واحد ف الميدان

ليه رجعنا م الميدان بقلوب أقوي من الحجر
ليه نسينا مهما كان إن احنا ف الأخر بشر
ليه الوطن علينا هان
ليه رفضنا الأمان
ليه قتلنا الجنين
وقلنا ف الأخر قدر
هو إحنا صناع القدر

مسلم ومسيحي كنا
عايشين ف أمن وأمان
ليه علي بعض هنا
نسينا ليه عشرة زمان
طب كنا ليه قلب واحد ف الميدان

تقتل أخوك شرعا حلال
كان لما يشتد القتال
ويذيد تعصب الرجال
نمسك سلاحنا ف إيدنا
وسلاحنا كان عصايه شوم
ولما رجعنا م الميدان
أصبحنا زي الأمريكان
سلاحنا أآلي وأربجيه
جيوش الفرس ضد الروم

بيع الآثار امحي الحضارة
ماتسمحشي لحد بكلام
ولع ف سكان العمارة
اصل صاحبها من النظام
النظام بتاع زمان
طب كنا ليه قلب واحد ف الميدان

مين اللي خانك
مين اللي خاني
مين اللي خان
ارجع يامصري
لأصلك وأصلي
أصل الوفاء اصل الأمان
هو دا العهد اللي بينا
إن إحنا نرجع زى ما كنا
في الميدان
إن إحنا نبقي قلب واحد
مهما كان
هو دا عهد الميدان
هو دا
عهد الميدان
٠٢:ص، س ٠١/١٠/٢٠١١

عهد الميدان

ضياء الادريسي
diaa571@yahoo.com

منتدي شعراء الوطن العربي
ضياء الادريسي

اهلا بك اخي الكريم في منتديات سمر و شهد

شرفتنا ونورتنا...وهديه مقبوله

لقد اعجبتني وكنت محرج ان استئذن منك في وضعها هنا

شكرا جزيلا لك..وفي الانتظار لمذيد من ابداعاتك

تقبل تحياتي واحترامي